向主持Eson告別式的陳畊志牧師要了他的告別禮拜講章，和程序單。之前跟他講了我所認識的Eson，也讓他看Eson的臉書，他一眼就看到封面圖片是貞文的畫。他很用心準備這場告別式，選用好撒瑪利亞人的故事，講撒瑪利亞人受歧視卻勇敢救人。我讀了講章很感動。
海葬的部分，他沒有寫下講辭，但我想一定很感人。他選的詩歌是：彩虹的約定。結果海葬回程的時候，天邊出現了彩虹。真是美好。
圖片是他寄給我的，海葬後的彩虹。
講章：
2023/11/11 張乙勝弟兄 告別禮拜〈路加福音10:25~37〉【彼位好者】
咱在座屬佇張乙勝 兄弟的遺族，新安長老、美香長老、玉如、達勝，與教會界的眾牧者同工、兄弟姊妹，以及親朋好友，大家平安。亦願主耶穌的平安與咱同在。
我相信咱聚集佇遮，不是為著盡一個禮數爾爾，我相信，咱是因為疼這個少年人――思念伊、呣甘伊的離開，所以聚集。我相信，咱亦是因為上帝的疼――聚集佇遮用禮儀來追思咱的兄弟；因為，佇主內，咱攏是上帝的兒女，攏有份得著上帝的疼：就是永遠活的應允，以及天堂的盼望。上帝的疼真公平來臨到佇每一個人，無人生成就是「顧人怨」，亦無人生成就是「得人疼」。佇上帝的眼中，屬佇伊的兒女伊攏疼。Eson就是上帝所疼的子兒。在咱繼續用上帝的話來彼此安慰之前，咱閣一遍來祈禱：
【講道前的禱告】
創造生命，掌權人類活動的至聖天父，阮仰望祢、感謝祢，
因為佇祢的預定下面，受揀選的人，靈魂來到世間，亦欲閣轉去祢遐，
而且是永永遠遠佇祢榮耀的國度裡面，佇遐，卡贏世間一切的快樂。
天父上帝，阮相信
張乙勝兄弟的靈魂已經轉去佇祢遐，
無驚惶，無病痛，亦無這世間一切的煩惱。
總是，慈悲的天父，求祢的安慰、陪伴、溫暖，與醫治，
通過聖神的運行來充滿佇阮。
雖然咱有信心，總是，亦有祢創造互阮的情感，及祢賞賜的疼，
這個情感互阮對
乙勝真思念、真呣甘。
天父上帝，
張乙勝兄弟已經完成伊一生美好的路程，
安息佇祢溫暖閣慈悲的懷抱裡面，
阮心中有呣甘，總是求祢的平安，與安慰來充滿阮，
今，伊肉體的形象阮無閣看見，不過，伊佇世間的見證，卻欲永遠囥佇阮的心裡。
伊的靈魂亦永遠佇祢榮耀的國度。
願主天父的安慰不斷充滿阮的心，繼續堅固阮的信。
阮抱著呣甘的心情來求主的憐憫。
按呢祈禱，是奉靠主耶穌基督得勝的名求！阿們。
頭拄仔，咱有講著一個議題：有誰生成就是「顧人怨」，誰生成就是「得人疼」的嗎？對咱現代的基督徒來講，當然是人人平等，人人攏有資格得著上帝的疼；總是佇主耶穌的時代，卻呣是咱所想的按呢。佇主耶穌的時代，真正有分做：「上帝所疼的人」，以及「上帝所詛咒的人」！誰是上帝所疼的人？猶太人。誰是上帝詛咒的人――猶太人以外的人，包括撒馬利亞人。就這馬的「以巴戰爭」來講，以色列人會去想講：對方亦是拜上帝的人嗎？對方亦是上帝所疼的兒女嗎？一旁叫上帝「耶和華」另外一旁叫上帝「阿拉」，總是，不管𪜶按怎稱呼，拜的就是仝一位上帝。哪按呢講起來，佇上帝的眼中，豈呣是家己人啲打家己人，兄弟姊妹中間啲相拍嗎？
今仔日，主耶穌講「撒馬利亞人」是好人，這聽佇猶太人的耳中是非常無爽快的代誌！當然，不管，主耶穌是講：「撒馬利亞人是好人」，亦是「好的撒馬利亞人」，猶太人攏認為，撒馬利亞人無資格互人講𪜶是「好者」，因為，對猶太人來講，撒馬利亞人生來就是「顧人怨」、生成就是「上帝所詛咒的人」！不管𪜶有做了什麼好的代誌。
為什麼：主耶穌欲講這個「好的撒馬利亞人」的故事？因為，有人刁工找主耶穌麻煩，欲看主耶穌會使按怎回答。這個找主耶穌麻煩的人，是一位聖經教師；某一個程度，這種人物就是將全律法攏遵守給真徹底的人！這位聖經教師問主耶穌：「老師我著做什麼才會得著永遠的活命？」其實，這個聖經教師呣是真正想欲知影，伊反轉是料想講，主耶穌會給伊回答：「你這馬已經有永遠的活命啦！」因為，伊生來就是猶太人，閣對遵守律法真有把握。不過，主耶穌卻無照伊所料想的按呢給伊謳咾――反轉問伊講：「律法有寫什麼？你按怎了解？」聖經教師回答講：「你著全心、全情、全力、全意疼主，你的上帝；閣著疼厝邊親像疼家己。」主耶穌謳咾伊講了對，勉勵伊照按呢去行，就會使得著永遠的活命。聖經教師心裡自然是呣甘願，因為，主耶穌只是謳咾伊聖經真識，但是，並無永遠的活命。所以，伊繼續給主耶穌諍：「什麼人是我的厝邊？」然後，主耶穌就給伊講這個「撒馬利亞人是好人」的故事。
佇這個故事裡面，咱看去一個真現實的代誌：人的地位與尊嚴，會因為他的狀況來改變！這個去互強盜打給半死的人，呣免懷疑，伊就是猶太人，因為，除了猶太人會使佇耶路撒冷出入以外，外邦人是無啥機會的。這個去互打給半死的猶太人，去互𪜶的神職人員看輕、排擠。我相信，伊若無遇著強盜，好好無代誌，這兩位神職人員絕對會與伊打招呼「Shalom（平安）」，然後相親。但是，當伊去互強盜打給半死了後――伊失去了做一個人的尊嚴，互這兩位神職人員閃伊――閃遠遠，完全無打算關心伊的狀況。當然，律法有規定，神職人員若是沐著律法所定義無清氣的物件，𪜶就會無清氣，無法度主持禮拜，除非，𪜶完成潔淨禮。死人，亦算是無清氣的――所以，這兩位神職人員為著保持家己清氣，免得沐著濫糝、汙穢，𪜶對這個弱勢者準無看著――直接閃走。
我想撒馬利亞人尚會使體會這種感受，這種生落來就注定互猶太人看輕，注定是上帝所棄捨的人――的這種心情。減採，這位撒馬利亞人遠遠就看去代誌的經過――心裡想講：這呣是恁家己人嗎？哪會因為伊遇著歹的際遇，就失去做一個人的尊嚴？聖經描寫講：這個撒馬利亞人對這個受傷的猶太人心裡真呣甘。所以，盡伊所會使的來幫助這位身體受傷、心理亦受傷的猶太人：一個失去做人的尊嚴的人。
Eson伊是一位真特別的人，對我來講，伊是一位藝術家。佇伊facebook的封面照片有囥一張「聖餐」的畫。後來，我發現，Eson竟然與我的論文指導教授 王貞文牧師有熟悉，這幅「聖餐」的畫，就是
貞文牧師分享互伊的。我亦聽多多的人分享伊過去按怎佇聖誕節佈置禮拜堂，閣有多多牧者給我分享講：伊真甘奉獻，有需要的所在，伊攏會盡伊的力去服務、分享。特別，伊佇恆春所開的店「AgaPe+愛紀錄」，亦成做多多人的祝福；彼間店不只是賣手工藝品，同時，是伊傳福音，為基督做見證的一個所在，減採，對伊來講，彼間店是為著欲團契來使用的。雖然，我與伊無熟悉――總是，我聽著的，攏是伊按怎幫助人，按怎為人付出與奉獻。我想，這應該就是主耶穌所講的：得著永遠活的人。因為，伊全心、全情、全力、全意疼主上帝，為著福音的原故，開一間為著傳福音使用的店面。伊閣疼厝邊親像疼家己，佇有需要的人付出伊所會使的，成做多多人的祝福。若按呢，我講Eson是一位得著永遠活的人，咱應該攏會「阿們」吧！
Eson是一位敬虔的青年，當然，這是因為伊有敬虔父母通成做伊的典範。願上帝的神賜落安慰――佇咱的遺族；願基督的救恩――繼續來堅固咱的信心；願Eson佇世間所服事的一切，歸榮光互上帝，亦將平安賜互在座的人，特別，賜互所有的遺族――咱做伙來祈禱。
【講道後的禱告】
親愛的救主，阮所敬拜的天父上帝，阮感謝祢的保守與看顧，
互阮為 張乙勝兄弟的遺族所辦的告別禮拜，非常順勢，
榮耀祢的聖名，也讓多多親友及主內同工，
通過祢生命的真道，得到很大的造就。
主啊！我們的生死禍福攏佇祢的手中，求祢加添阮的力量，
使阮知影按怎仰望祢、倚靠祢，跟隨祢走天堂得救的正路。
雖然阮思念離開的故人，總是阮閣卡知，伊已經安息在祢的懷抱裏面，
等有一日，祢欲從天閣一遍降臨，天使吹哨角的時，
阮攏欲倚靠祢的聖神，復活、改變，成為屬靈的身體，
與祢進入天國榮耀的地方，跟他同享永生的福樂。
願天父的慈悲、痛疼，主耶穌基督的恩典，以及聖神的相通、感動，
所帶來的安慰、扶持，與我阮眾人佇在，直到主耶穌閣再來的日。
阮這樣祈禱，是奉靠主耶穌基督的名，阿們。
